खुल्ला न्यूज
गुल्मी । मोटरसाइकल दुर्घटनामा दुई जना गम्भीर घाइते भएका छन् ।सदरमुकाम तम्घासबाट शनिबार रातिको समयमा इस्मातर्फ जाँदै गरेको बा ५१ प २८३४ नम्बरको मोटरसाइकल रेसुङ्गा नगरपालिका – ४ सेउवा तलको जङ्गल स्थित तम्घास–सिमलटारी सडकखण्डमा दुर्घटना हुँदा दुई जना घाइते भएका हुन् ।
प्रहरीका अनुसार घाइते हुनेमा इस्मा गाउँपालिका – टाकुरा निवासी २६ वर्षिय चालक दिपक घर्ती र पछाडि सवार ३५ वर्षिय कृष्ण बहादुर केसी रहेका छन् । घाइते मध्ये घर्तीको बायाँ खुट्टा भाचिएको छ । टाउकामा चोट लागेका अर्का घाइते केसीको अवस्था अलि गम्भीर रहेको प्रहरीले प्रराम्भिक जानकारी दिएको छ ।
अहिले जिल्ला अस्पतालमा ल्याइएका दुई मध्ये केसीको होस अझै नखुलेको प्रहरीको भनाई छ । तिब्रगतिमा जाँदै गरेको मोटरसाइकल अनियंत्रित भै सडकदेखि करिब ५० मिटर तल खसेको प्रारम्भिक जानकारी आएको र थप कुरा बुझ्ने काम भैरहेको जिल्ला प्रहरी प्रवक्ता डिएसपी माधवराज खरेलले बताए । गम्भीर घाइते दुबै जनालाई पाल्पा रिफर गरिएको र पठाउने तयारी भएको उनले बताए ।
